政情：煲呔曾過橋抽板辣興商界

煲呔曾領導夕陽政府任期所剩無幾，但至今仍未兌現將利得稅下調至百分之十五承諾，被商界窮追猛打。不過，煲呔曾好似借聾耳陳隻耳咁，淨係識諸多推搪，尋日仲唔知醜呼籲商界支持制訂競爭法，隨即激起在場商家怒火，狠批煲呔曾此舉簡直係送兩舊屎畀商界，有商家更答問環節未完結前已急急離場，完全當佢透明兼冇到。煲呔曾人未走茶已涼，真係可悲！

有雷曼苦主到會場外請願，狠批煲呔曾。（郭曉樂攝）

雷曼苦主斥將香港變臭港

煲呔曾尋日出席商界聯席午餐會推介任內最後一份施政報告，會前有十多名雷曼苦主到會場外贈興，展示一張有舊屎放煲呔曾頭頂海報，寓意煲呔曾「將香港變臭港」，有示威者則狠批煲呔曾係「垃圾」同縮頭烏龜，既冇做好呢份工，又唔肯面對群眾接收請願信，總之人人喊打，最後佢同在場公關經過一輪交涉後先至和平散去。

放大圖片

除雷曼苦主對夕陽政府怨聲載道外，煲呔曾場內繼續辣火頭，呼籲商界支持制訂競爭法，聲稱有關法例不但會增加市場透明度，長遠來講對營商亦有好處，又話早前修訂足以回應商界疑慮，期望條例可以佢任內通過。競爭法向來被商界形容為商界「二十三條」，如今煲呔曾公開觸及商界神經，未幾即有數十名商家未及答問環節結束就已經陸續先行離場。

至於逗留會場商家亦唔畀煲呔曾好過，鍥而不捨追問佢當年開出下調利得稅選舉期票，但煲呔曾繼續顧左右而言他，死撐上任後遇上金融海嘯，更卸責話欠商界百分之一利得稅，或者會同佢繼任人講喎，認真無賴。難怪會後有商界中人狠批煲呔曾「過橋抽板」，既唔肯兌現競選承諾，又出口術要佢支持競爭法，絕對唔係一啖沙糖一啖屎，而係兩啖都係屎喎！

話時話，唔知煲呔曾係咪有陰影驚畀人鬧佢官商勾結，所以任內一直唔敢下調利得稅，不過無論乜理由都好，開選舉期票就要履行承諾，如果側側膊呃人幾年後當冇，佢餘下幾個月任期只會繼續眾叛親離，而且做特首冇口齒就更加遺臭萬年。