香港第一府　羞辱式訴苦

香港未必係真真正正創意之都，不過官民之間鬥智鬥力，有時都相當有創意。呢，尋日喎，禮賓府舉行開放日，理論上係畀人賞花，實際上係玩捉迷藏，示威人士固然有創意，警務人員同樣有創意。

先講講示威人士。你知啦，禮賓府守森嚴門高狗大，當然唔方便大鑼大鼓操入去抗議，所以八十後年輕人分頭行事，唔聲唔聲低調潛入。好，人齊之後就開始玩，玩乜呢？玩砌字遊戲，事關示威人士有備而來，外套之下Ｔ恤全部寫上大字，有人心口一個「權」字，有人心口一個「台」字，有人心口一個「曾」字。

砌字遊戲係咁樣玩，五個示威者排成一行，一二三四五，齊齊拉外套，「曾蔭權下台」五粒大字驚現禮賓府！

係就係有創意，之但係，怕唔怕砌錯字，例如「曾蔭下台權」？放心，呢班後生仔女非常醒目，而且好有默契，絕對唔會學似禮賓府主人咁經常錯用成語，將「感同身受」講成「身同感受」。

至於雷曼苦主，示威方法不遑多讓，都係拉開外套見字樣，砌字遊戲同樣玩得有板有眼。

好，轉頭又講講警務人員有乜創意。雖然話八十後年輕人分頭行事低調潛入，充滿神探細胞師兄師姐點會睇漏眼，其實一早就嚴密布防，五步一崗，十步一哨，簡直係殺雞用牛刀，射蚊開大炮。便衣警察一比一貼身緊迫人盯人都未算過癮，最有創意係，警方動用狗仔隊王牌跟蹤技術，居然調派男警女警假扮情侶，呢邊作狀賞花，邊扮影相，可惜冇戲假情真攬攬錫錫，否則功夫茶絕對唔介意讚佢十個叻。

因乜事幹堂堂「香港第一府」忽然之間會淪為「賞花變訴苦」？冇辦法，怨氣多得滯，政府又弱雞，咁咪自招其辱囉。

政府弱雞表現，其實都唔係第一次喇，記唔記得不久前有家務員呼朋引類ＢＢＱ？搞到禮賓府好似街邊公園大笪地，好彩冇人醉酒索Ｋ搞破壞咋，如果唔係仲肉酸。

唉，話就話係賞花變訴苦，其實諗深一層，潛入禮賓府示威砌字遊戲同羞辱權威差不多。試想想，英國殖民地時代有乜可能會出現咁情況？禮賓府前身即係港督府，莫講話冇人夠膽騷擾港督，即使真係有人膽生毛，睇怕未踏入上亞厘畢道已經人間蒸發。

所以話，世界變咯，禮賓府居然受到羞辱式訴苦，反映回歸之後特區政府尊嚴掃地，管治權威所剩無幾。

話時話，今時今日睇番轉頭，當年董建華拒絕入住禮賓府，可能係一個甚有遠見英明決定。喂，老董住私家豪宅，安全程度可能更勝香港第一府，起碼冇人可以潛入董府玩嘛。家陣八十後示威者去到「曾府」要求「府主」下台，「府主」即係「苦主」，乜面子都丟清光啦！

08 Mar 2010